1. Veshja e Nuses

• Peshqiri, i punuar në tezgjah me melez dhe motive shumëngjyrëshe në të dy anët.

• Këmisha e gjatë: Pëlhurë e bardhë (pambuk, melez, mëndafsh). Ka mëngë shumë të gjera, të punuara me qëndisje në skaje dhe tek jaka e saj.

• Tlina: Janë të holla prej pambuku të bardhë, të qëndisura në fund, që vishen poshtë këmishës dhe shkojnë deri te kyçet.

• Duvak, copë me ngjyrë të kuqe e punuar në tezgjah me kryq në pjesën e kokës.

• Brezi: Rrip i gjerë rreth belit që mban veshjen kompakte. Te nuset është i qëndisur me fije ari ose argjendi.

• Boçja: Vendoset mbi këmishë përpara. E punuar me tezgjah dhe me motive shumëngjyrëshe sipas moshave (e kuqe, e gjelbër, vishnje).

• Kuret: Copë shajaku me ngjyrë të kuqe dhe gojtana në pjesën e sipërme dhe ngjyrë të zezë pjesa e poshtme, ndërsa pjesa e fundit (rreth 20 cm) me ngjyrë të kuqe. 

• Pshtjellsë: Elementi që mbulon pjesën e pasme të nuses. Është e punuar në tezgjah me fije leshi të hollë,  e dendur dhe me rrudha (palë-palë), e qëndisur me mjeshtëri.

• Jeleku: Korse e hapur pa mëngë, zakonisht prej kadifeje të kuqe, e mbuluar me qëndisje të dendura ari dhe sumlla prej sermi.

• Maniku: I punuar me tezgjah dhe me fudulla prej sermi.

• Çorapet dhe Opingat: Çorape leshi me ngjyra me thurje dekorative dhe opinga lëkure (ose këpucë karakteristike).

• Stolitë: Kurora dhe Gjerdani me grashatarë dhe kryq; Vathët me napolona; Unazat në filigran; Hajmalia dhe kryqi të stolisura me gurë shumëngjyrësh; Rreshta me napolona dhe gurë shumëngjyrësh.

• Futa: Copë që e vendoste nusja përpara me ngjyrë të zezë dhe kuqe.

2. Veshja e Burrit
Më e thjeshtë, por shumë burrërore dhe praktike:

• Këmisha: E bardhë, me grykë të hapur dhe mëngë të gjata.

• Tirqit:  Pantallona prej shajaku të bardhë me 12 gajtanë të zinj anash. Janë të ngushta pas këmbës dhe të gjera te beli.

•  Xhamadani: Jelek i shkurtër shajaku, i dekoruar me gajtanë të zinj ose të kuq të errët.

• Brezi i leshit: Rrip shumë i gjatë (disa metra) që mbështillet rreth belit për të mbajtur armët apo mjetet.

• Qeleshja (Plisi): E rrumbullakët ose pakëz e shtypur sipër, e punuar me lesh dhensh të shkelur mirë.

• Çorapet dhe Opinga: Çorape leshi të bardha që mulohen pjesërisht nga tirqit.

3. Materialet Kryesore
•    Mëndafshi: Prodhimi vendas i krimbit të mëndafshit që i jep veshjes shkëlqim dhe lehtësi.

•    Shajaku: Lesh i rrahur fort për tirqit dhe veshjet e dimrit. 

      Leshi: Për brezat, çorapet, pshtjellcat dhe pshtjellaket. 
•    Pambuku: Për këmishat, tlinat, boçet dhe manikët.